בני עשיו
(א)וְאֵלֶּה תֹּלְדוֹת עֵשָֹו הוּא אֱדוֹם:
(ב)עֵשָֹו לָקַח אֶת-נָשָׁיו מִבְּנוֹת כְּנָעַן אֶת-עָדָה בַּת-אֵילוֹן הַחִתִּי וְאֶת-אָהֳלִיבָמָה בַּת-עֲנָה בַּת-צִבְעוֹן הַחִוִּי: (ג)וְאֶת-בָּשְֹמַת בַּת-יִשְׁמָעֵאל אֲחוֹת נְבָיוֹת:
(ד)וַתֵּלֶד עָדָה לְעֵשָֹו אֶת-אֱלִיפָז וּבָשְֹמַת יָלְדָה אֶת-רְעוּאֵל:
(ה)וְאָהֳלִיבָמָה יָלְדָה אֶת-יְעוּשׁ וְאֶת-יַעְלָם וְאֶת-קֹרַח אֵלֶּה בְּנֵי עֵשָֹו אֲשֶׁר יֻלְּדוּ-לוֹ בְּאֶרֶץ כְּנָעַן:
(ו)וַיִּקַּח עֵשָֹו אֶת-נָשָׁיו וְאֶת-בָּנָיו וְאֶת-בְּנֹתָיו וְאֶת-כָּל-נַפְשׁוֹת בֵּיתוֹ וְאֶת-מִקְנֵהוּ וְאֶת-כָּל-בְּהֶמְתּוֹ וְאֵת כָּל-קִנְיָנוֹ אֲשֶׁר רָכַשׁ בְּאֶרֶץ כְּנָעַן וַיֵּלֶךְ אֶל-אֶרֶץ מִפְּנֵי יַעֲקֹב אָחִיו:
(ז)כִּי-הָיָה רְכוּשָׁם רָב מִשֶּׁבֶת יַחְדָּו וְלא יָכְלָה אֶרֶץ מְגוּרֵיהֶם לָשֵֹאת אֹתָם מִפְּנֵי מִקְנֵיהֶם:
(ח)וַיֵּשֶׁב עֵשָֹו בְּהַר שֵֹעִיר עֵשָֹו הוּא אֱדוֹם:
עשיו לוקח את נשותיו ובניו ואת כל הרכוש שלו הולך לארץ אחרת מכיוון שהרכוש שלהם רב מדי מכדי שיוכלו לשבת יחד. הוא הולך להר שעיר, אדום.
שושלת עשיו
(ט)וְאֵלֶּה תֹּלְדוֹת עֵשָֹו אֲבִי אֱדוֹם בְּהַר שֵֹעִיר:
(י)אֵלֶּה שְׁמוֹת בְּנֵי-עֵשָֹו אֱלִיפַז בֶּן-עָדָה אֵשֶׁת עֵשָֹו רְעוּאֵל בֶּן-בָּשְֹמַת אֵשֶׁת עֵשָֹו: (יא)וַיִּהְיוּ בְּנֵי אֱלִיפָז תֵּימָן אוֹמָר צְפוֹ וְגַעְתָּם וּקְנַז:
(יב)וְתִמְנַע הָיְתָה פִילֶגֶשׁ לֶאֱלִיפַז בֶּן-עֵשָֹו וַתֵּלֶד לֶאֱלִיפַז אֶת-עֲמָלֵק אֵלֶּה בְּנֵי עָדָה אֵשֶׁת עֵשָֹו:
(יג)וְאֵלֶּה בְּנֵי רְעוּאֵל נַחַת וָזֶרַח שַׁמָּה וּמִזָּה אֵלֶּה הָיוּ בְּנֵי בָשְֹמַת אֵשֶׁת עֵשָֹו:
(יד)וְאֵלֶּה הָיוּ בְּנֵי אָהֳלִיבָמָה בַת-עֲנָה בַּת-צִבְעוֹן אֵשֶׁת עֵשָֹו וַתֵּלֶד לְעֵשָֹו אֶת-יְעוּשׁ וְאֶת-יַעְלָם וְאֶת-קֹרַח: (טו)אֵלֶּה אַלּוּפֵי בְנֵי-עֵשָֹו בְּנֵי אֱלִיפַז בְּכוֹר עֵשָֹו אַלּוּף תֵּימָן אַלּוּף אוֹמָר אַלּוּף צְפוֹ אַלּוּף קְנַז: (טז)אַלּוּף-קֹרַח אַלּוּף גַּעְתָּם אַלּוּף עֲמָלֵק אֵלֶּה אַלּוּפֵי אֱלִיפַז בְּאֶרֶץ אֱדוֹם אֵלֶּה בְּנֵי עָדָה:
(יז)וְאֵלֶּה בְּנֵי רְעוּאֵל בֶּן-עֵשָֹו אַלּוּף נַחַת אַלּוּף זֶרַח אַלּוּף שַׁמָּה אַלּוּף מִזָּה אֵלֶּה אַלּוּפֵי רְעוּאֵל בְּאֶרֶץ אֱדוֹם אֵלֶּה בְּנֵי בָשְֹמַת אֵשֶׁת עֵשָֹו:
(יח)וְאֵלֶּה בְּנֵי אָהֳלִיבָמָה אֵשֶׁת עֵשָֹו אַלּוּף יְעוּשׁ אַלּוּף יַעְלָם אַלּוּף קֹרַח אֵלֶּה אַלּוּפֵי אָהֳלִיבָמָה בַּת-עֲנָה אֵשֶׁת עֵשָֹו:
אלופי אדום
(יט)אֵלֶּה בְנֵי-עֵשָֹו וְאֵלֶּה אַלּוּפֵיהֶם הוּא אֱדוֹם:
(כ)אֵלֶּה בְנֵי-שֵֹעִיר הַחֹרִי ישְׁבֵי הָאָרֶץ לוֹטָן וְשׁוֹבָל וְצִבְעוֹן וַעֲנָה:
(כא)וְדִשׁוֹן וְאֵצֶר וְדִישָׁן אֵלֶּה אַלּוּפֵי הַחֹרִי בְּנֵי שֵֹעִיר בְּאֶרֶץ אֱדוֹם:
(כב)וַיִּהְיוּ בְנֵי-לוֹטָן חֹרִי וְהֵימָם וַאֲחוֹת לוֹטָן תִּמְנָע:
(כג)וְאֵלֶּה בְּנֵי שׁוֹבָל עַלְוָן וּמָנַחַת וְעֵיבָל שְׁפוֹ וְאוֹנָם:
(כד)וְאֵלֶּה בְנֵי-צִבְעוֹן וְאַיָּה וַעֲנָה הוּא עֲנָה אֲשֶׁר מָצָא אֶת-הַיֵּמִם בַּמִּדְבָּר בִּרְעֹתוֹ אֶת-הַחֲמֹרִים לְצִבְעוֹן אָבִיו: (כה)וְאֵלֶּה בְנֵי-עֲנָה דִּשֹׁן וְאָהֳלִיבָמָה בַּת-עֲנָה:
(כו)וְאֵלֶּה בְּנֵי דִישָׁן חֶמְדָּן וְאֶשְׁבָּן וְיִתְרָן וּכְרָן:
(כז)אֵלֶּה בְּנֵי-אֵצֶר בִּלְהָן וְזַעֲוָן וַעֲקָן:
(כח)אֵלֶּה בְנֵי-דִישָׁן עוּץ וַאֲרָן:
(כט)אֵלֶּה אַלּוּפֵי הַחֹרִי אַלּוּף לוֹטָן אַלּוּף שׁוֹבָל אַלּוּף צִבְעוֹן אַלּוּף עֲנָה:
(ל)אַלּוּף דִּשֹׁן אַלּוּף אֵצֶר אַלּוּף דִּישָׁן אֵלֶּה אַלּוּפֵי הַחֹרִי לְאַלֻּפֵיהֶם בְּאֶרֶץ שֵֹעִיר:
מלכי ארץ אדום
(לא)וְאֵלֶּה הַמְּלָכִים אֲשֶׁר מָלְכוּ בְּאֶרֶץ אֱדוֹם לִפְנֵי מְלָךְ-מֶלֶךְ לִבְנֵי יִשְֹרָאֵל:
(לב)וַיִּמְלךְ בֶּאֱדוֹם בֶּלַע בֶּן-בְּעוֹר וְשֵׁם עִירוֹ דִּנְהָבָה:
(לג)וַיָּמָת בָּלַע וַיִּמְלךְ תַּחְתָּיו יוֹבָב בֶּן-זֶרַח מִבָּצְרָה:
(לד)וַיָּמָת יוֹבָב וַיִּמְלךְ תַּחְתָּיו חֻשָׁם מֵאֶרֶץ הַתֵּימָנִי:
(לה)וַיָּמָת חֻשָׁם וַיִּמְלךְ תַּחְתָּיו הֲדַד בֶּן-בְּדַד הַמַּכֶּה אֶת-מִדְיָן בִּשְֹדֵה מוֹאָב וְשֵׁם עִירוֹ עֲוִית:
(לו)וַיָּמָת הֲדָד וַיִּמְלךְ תַּחְתָּיו שַֹמְלָה מִמַּשְֹרֵקָה:
(לז)וַיָּמָת שַֹמְלָה וַיִּמְלךְ תַּחְתָּיו שָׁאוּל מֵרְחֹבוֹת הַנָּהָר:
(לח)וַיָּמָת שָׁאוּל וַיִּמְלךְ תַּחְתָּיו בַּעַל חָנָן בֶּן-עַכְבּוֹר:
(לט)וַיָּמָת בַּעַל חָנָן בֶּן-עַכְבּוֹר וַיִּמְלךְ תַּחְתָּיו הֲדַר וְשֵׁם עִירוֹ פָּעוּ וְשֵׁם אִשְׁתּוֹ מְהֵיטַבְאֵל בַּת-מַטְרֵד בַּת מֵי זָהָב:
(מ)וְאֵלֶּה שְׁמוֹת אַלּוּפֵי עֵשָֹו לְמִשְׁפְּחֹתָם לִמְקֹמֹתָם בִּשְׁמֹתָם אַלּוּף תִּמְנָע אַלּוּף עַלְוָה אַלּוּף יְתֵת:
(מא)אַלּוּף אָהֳלִיבָמָה אַלּוּף אֵלָה אַלּוּף פִּינֹן:
(מב)אַלּוּף קְנַז אַלּוּף תֵּימָן אַלּוּף מִבְצָר:
(מג)אַלּוּף מַגְדִּיאֵל אַלּוּף עִירָם אֵלֶּה אַלּוּפֵי אֱדוֹם לְמשְׁבֹתָם בְּאֶרֶץ אֲחֻזָּתָם הוּא עֵשָֹו אֲבִי אֱדוֹם:
אין תגובות:
הוסף רשומת תגובה